ក្នុងនាមប្រធានក្រុមប្រឹក្សាភិបាល ខ្ញុំមានកិត្តិយសក្នុងការបង្ហាញរបាយការណ៍ប្រចាំឆ្នាំរបស់ ប៊ែមប៊ូ ហ្វាយនែន ភីអិលស៊ី សម្រាប់ឆ្នាំសារពើពន្ធ ដែលបានបញ្ចប់នៅថ្ងៃទី៣១ ខែធ្នូ ឆ្នាំ២០២៤។ ឆ្នាំនេះជាព្រឹត្តិការណ៍សំខាន់មួយនៅក្នុងដំណើររបស់យើង ខណៈដែលយើងបន្តបំពេញបេសកកម្មក្នុងការផ្តល់សេវាកម្មហិរញ្ញវត្ថុដែលមានភាពងាយស្រួលអាចទទួលបាន ទំនួលខុសត្រូវ និងប្រកបដោយនិរន្តរភាពដល់អតិថិជនគោលដៅ។
សេដ្ឋកិច្ចពិភពលោកបានបង្ហាញពីភាពធន់ ដោយរក្សាកំណើនធៀបនឹងឆ្នាំមុន ទោះបីជាមានភាពតានតឹងផ្នែកភូមិសាស្ត្រនយោបាយ និងជម្លោះដែលកំពុងបន្តក៏ដោយ។ យោងតាមមូលនិធិរូបិយវត្ថុអន្តរជាតិ (IMF) កំណើនសេដ្ឋកិច្ចសកលត្រូវបានប៉ាន់ប្រមាណថានឹងឈានដល់ ៣,២% នៅឆ្នាំ២០២៤។ តំបន់អាស៊ាន ជាពិសេសត្រូវបានគេរំពឹងថានឹងមានកំណើន ៤,៦% ដែលជម្រុញឲ្យអតិផរណាធ្លាក់ចុះពី ៦,៧% ក្នុងឆ្នាំ២០២៣ មក ៥,៧% ក្នុងឆ្នាំ២០២៤ ដែលអនុញ្ញាតឱ្យធនាគារកណ្តាលជាច្រើនកាត់បន្ថយអត្រាការប្រាក់។
នៅកម្ពុជា យើងមានសុទិដ្ឋិនិយមចំពោះទស្សនវិស័យសេដ្ឋកិច្ចរបស់ប្រទេស ដោយមានការព្យាករណ៍កំណើន ៦% ក្នុងឆ្នាំ២០២៤ បើធៀបនឹង ៥% ក្នុងឆ្នាំ ២០២៣។ ការអនុវត្តជាវិជ្ជមាននេះ ត្រូវបានជំរុញដោយកំណើនខ្លាំងក្នុងវិស័យផលិតកម្ម និងការងើបឡើងវិញជាបន្តបន្ទាប់នៅក្នុងវិស័យទេសចរណ៍។ វិស័យកសិកម្មក៏ទទួលបាននូវភាពរីកចម្រើនគួរឱ្យកត់សម្គាល់ ជាពិសេសនៅក្នុងផលិតកម្មស្រូវ កៅស៊ូ និងជលផល។ ទោះជាយ៉ាងណាក៏ដោយ វិស័យសំណង់ និងអចលនទ្រព្យបានបង្ហាញសញ្ញានៃភាពទន់ខ្សោយ ដោយតម្រូវការមានការធ្លាក់ចុះ និងការកែតម្រូវតម្លៃទីផ្សារ។
នៅក្នុងបរិបទសេដ្ឋកិច្ចដែលកំពុងវិវត្តនេះ ប៊ែមប៊ូ ហ្វាយនែន ភីអិលស៊ី នៅតែរក្សាការប្តេជ្ញាចិត្តយ៉ាងមុតមាំក្នុងការបង្កើតផលជាវិជ្ជមានសម្រាប់អតិថិជន និងភាគីពាក់ព័ន្ធរបស់យើង។ ទោះបីជាវិស័យនេះមានបញ្ហាប្រឈមច្រើនក៏ដោយ យើងមានមោទនភាពចំពោះវឌ្ឍនភាពគួរឲ្យកត់សម្គាល់ដែលសម្រេចបាន។ សមិទ្ធផលទាំងអស់នេះជាសក្ខីភាពនៃការលះបង់ និងការខិតខំប្រឹងប្រែងឥតឈប់ឈររបស់ថ្នាក់គ្រប់គ្រង បុគ្គលិក និងភាគីពាក់ព័ន្ធសំខាន់ៗ ដែលបានរួមចំណែកយ៉ាងសកម្មបំពេញគោលបំណងរបស់យើងក្នុងការអនុវត្តអាជីវកម្មប្រកបដោយទំនួលខុសត្រូវ និងផ្តល់តម្លៃសម្រាប់សហគមន៍។
ការអនុវត្តហិរញ្ញវត្ថុ
ក្នុងឆ្នាំ ២០២៤ ប៊ែមប៊ូ ហ្វាយនែន ភីអិលស៊ី បានអនុវត្តវិធីសាស្ត្រប្រុងប្រយ័ត្ន ដើម្បីរក្សាគុណភាពទ្រព្យសកម្ម និងធានានិរន្តរភាពហិរញ្ញវត្ថុ។ កិច្ចខិតខំប្រឹងប្រែងរបស់យើងបាននាំឱ្យទទួលបានប្រាក់ចំណេញសុទ្ធបន្ទាប់ពីការបង់ពន្ធចំនួន ៦២១,៧៦០ ដុល្លារអាមេរិក ជាមួយនឹងអត្រាចំណូលពីមូលធន (ROE) ១១% និងអត្រាចំណូលពីទ្រព្យសម្បត្តិ (ROA) ២%។
ផលប័ត្រឥណទានពង្រីកដល់ ២៩.៤១ លានដុល្លារអាមេរិក កើនឡើង ២៧% បម្រើអតិថិជនជាង ១៧,៨០០ នាក់។
ទោះបីជាអនុបាតឥណទានមិនដំណើរការ (NPL) កើនឡើងទាំងនៅក្នុងវិស័យធនាគារ (៧.៩%) និងមីក្រូហិរញ្ញវត្ថុ (៩%) ក៏ដោយ ប៊ែមប៊ូ ហ្វាយនែន ភីអិលស៊ី បានរក្សា NPL ទាបត្រឹម ៣,២២% ប៉ុណ្ណោះ។ ការអនុវត្តដ៏រឹងមាំនេះបង្ហាញពីការប្តេជ្ញាចិត្តរបស់យើងចំពោះការគ្រប់គ្រងហានិភ័យប្រកបដោយការប្រុងប្រយ័ត្ន និងសមត្ថភាពក្នុងការទប់ទល់នឹងបញ្ហាប្រឈមនានាក្នុងវិស័យនេះ ដោយធានាស្ថិរភាពហិរញ្ញវត្ថុ និងតម្លៃសម្រាប់ភាគីពាក់ព័ន្ធ។
គំនិតផ្តួចផ្តើមជាយុទ្ធសាស្ត្រ និងសមិទ្ធផល
ក្នុងឆ្នាំ ២០២៤ ប៊ែមប៊ូ ហ្វាយនែន ភីអិលស៊ី បានអនុវត្តគំនិតផ្តួចផ្តើមសំខាន់ៗជាច្រើន ដែលសម្រេចចក្ខុវិស័យរយៈពេលវែងរបស់យើងសម្រាប់កំណើននិរន្តរភាព ភាពធន់ និងផ្តល់តម្លៃអតិថិជនដ៏ប្រសើរ។ គំនិតផ្តួចផ្តើមសំខាន់ៗរួមមាន៖

• ពង្រីកសមត្ថភាពឌីជីថល ដើម្បីបង្កើនប្រសិទ្ធភាពសេវាកម្ម និងធ្វើឱ្យប្រសើរឡើងនូវការចូលប្រើសេវារបស់អតិថិជន។
• កែលម្អគំរូនៃការចូលរួមជាមួយអតិថិជន ដើម្បីបំពេញតម្រូវការដែលកំពុងវិវត្តដោយធានាថាយើងផ្តល់នូវដំណោះស្រាយដែលសមស្រប ដើម្បីជម្រុញការរួមបញ្ចូលផ្នែកហិរញ្ញវត្ថុ។
• វិនិយោគលើការអភិវឌ្ឍទេពកោសល្យ ដើម្បីពង្រឹងសមត្ថភាពក្រុមការងារ ត្រៀមខ្លួនជាស្រេចនឹងបញ្ហាប្រឈមនាពេលអនាគត។
• ពង្រឹងក្របខ័ណ្ឌគ្រប់គ្រងហានិភ័យ ដើម្បីការពារសុចរិតភាព និងនិរន្តរភាពនៃផលប័ត្រនៅក្នុងបរិយាកាសសេដ្ឋកិច្ចដែលកំពុងផ្លាស់ប្តូរ។

គំនិតផ្តួចផ្តើមទាំងនេះឆ្លុះបញ្ចាំងពីការប្តេជ្ញាចិត្តដ៏មុតមាំរបស់ ប៊ែមប៊ូ ហ្វាយនែន ភីអិលស៊ី ចំពោះកំណើនប្រកបដោយទំនួលខុសត្រូវ ភាពបត់បែនក្នុងប្រតិបត្តិការ និងការបង្កើតផលវិជ្ជមានយូរអង្វែងជូនអតិថិជន សហគមន៍ និងភាគីពាក់ព័ន្ធ។
ទំនួលខុសត្រូវសង្គមរបស់ក្រុមហ៊ុន (CSR)
ប៊ែមប៊ូ ហ្វាយនែន ភីអិលស៊ី បានបន្តរក្សាការប្តេជ្ញាចិត្តយ៉ាងមុតមាំចំពោះសេវាកម្មហិរញ្ញវត្ថុប្រកបដោយការទទួលខុសត្រូវ ការរួមបញ្ចូល និងគិតគូរពីបរិស្ថាន។ យើងបានចូលរួមគាំទ្រយ៉ាងសកម្មនូវគម្រោងអភិវឌ្ឍន៍សហគមន៍នៅទូទាំងប្រទេសកម្ពុជា ជាពិសេសនៅក្នុងវិស័យអប់រំ សុខភាព និងសហគ្រិនភាព។ តាមរយៈកិច្ចខិតខំប្រឹងប្រែងទាំងនេះ យើងផ្តល់អំណាចដល់បុគ្គលនីមួយៗ និងរួមចំណែកដល់វឌ្ឍនភាពនៃសហគមន៍មូលដ្ឋាន។
ប៊ែមប៊ូ ហ្វាយនែន ភីអិលស៊ី ក៏បានពង្រីកកម្មវិធីអក្ខរកម្មហិរញ្ញវត្ថុ ដោយផ្តោតលើប្រជាជនដែលមានប្រាក់ចំណូលទាប និងខ្វះខាត ដើម្បីលើកកម្ពស់ការយល់ដឹងកាន់តែស៊ីជម្រៅអំពីការគ្រប់គ្រងហិរញ្ញវត្ថុ និងការដាក់បញ្ចូលផ្នែកហិរញ្ញវត្ថុ។ ដោយឈរលើគោលការណ៍បរិស្ថាន សង្គម និងអភិបាលកិច្ច (ESG) ប៊ែមប៊ូ ហ្វាយនែន ភីអិលស៊ី នៅតែប្តេជ្ញាចិត្តយ៉ាងរឹងមាំក្នុងការផ្តល់តម្លៃប្រកបដោយនិរន្តរភាព និងផលវិជ្ជមានយូរអង្វែងសម្រាប់សង្គម និងបរិស្ថាន។
ទស្សនវិស័យសម្រាប់ឆ្នាំ ២០២៥
សម្លឹងឆ្ពោះទៅឆ្នាំ ២០២៥ ប៊ែមប៊ូ ហ្វាយនែន ភីអិលស៊ី នៅតែមានសុទិដ្ឋិនិយមចំពោះឱកាស និងបញ្ហាប្រឈមដែលនឹងមកដល់។ សកម្មភាពអាទិភាពសំខាន់ៗរបស់យើងរួមមាន៖

• បង្កើនគុណភាពផលប័ត្រឥណទាន៖ យើងនឹងបន្តផ្តោតលើការធ្វើឱ្យប្រសើរឡើងនូវគុណភាពនៃផលប័ត្រឥណទាន តាមរយៈវិធានការទប់ស្កាត់ជាមុននូវការខកខានសងបំណុល និងកិច្ចខិតខំប្រឹងប្រែងក្នុងការស្តារឡើងវិញប្រកបដោយប្រសិទ្ធភាព។ 
• ពង្រីកជម្រើសហិរញ្ញប្បទាន៖ ប៊ែមប៊ូ ហ្វាយនែន ភីអិលស៊ី នឹងធ្វើពិពិធកម្មប្រភពហិរញ្ញប្បទានរបស់ខ្លួន លើសពីការវិនិយោគរបស់ម្ចាស់ភាគហ៊ុន និងការរៀបចំកម្ចី ដើម្បីធានាថាយើងមានទុនគ្រប់គ្រាន់ដើម្បីគាំទ្រដល់កំណើនជាបន្តបន្ទាប់។ 
• បង្កើនទេពកោសល្យប្រកបដោយនិរន្តរភាព៖ យើងនឹងផ្តល់អាទិភាពដល់ការបណ្តុះបណ្តាល ការពង្រឹងជំនាញ និងគំនិតផ្តួចផ្តើមអភិវឌ្ឍន៍អាជីព ដើម្បីបង្កើនការរក្សាទេពកោសល្យ និងបង្កើតកម្លាំងពលកម្មដែលត្រៀមខ្លួនជាស្រេចនាពេលអនាគត។

ខ្ញុំសូមសម្តែងនូវការដឹងគុណដ៏ជ្រាលជ្រៅបំផុតចំពោះបុគ្គលិកគ្រប់រូបដែលមានការលះបង់ឥតងាករេ អតិថិជនដ៏ស្មោះស្ម័គ្រ ដៃគូសហការ និងម្ចាស់ភាគហ៊ុនរបស់យើង។ ការគាំទ្រ និងទំនុកចិត្តដ៏ឥតឈប់ឈររបស់អ្នករាល់គ្នា គឺជាមូលដ្ឋានគ្រឹះដ៏រឹងមាំនៃភាពជោគជ័យរបស់យើង។ ប៊ែមប៊ូ ហ្វាយនែន ភីអិលស៊ី ប្តេជ្ញាយ៉ាងមុតមាំចំពោះកំណើនប្រកបដោយនិរន្តរភាព និងការផ្តល់តម្លៃយូរអង្វែងសម្រាប់ភាគីពាក់ព័ន្ធទាំងអស់។ ដោយរួបរួមគ្នា យើងនឹងបន្តពង្រឹងសមិទ្ធផលដែលសម្រេចបាន និងខិតខំឆ្ពោះទៅរកភាពជោគជ័យកាន់តែធំធេងនៅក្នុងឆ្នាំខាងមុខ។

លោក រ័ត្ន យូម៉េង
ប្រធានក្រុមប្រឹក្សាភិបាល