ឈានចូលឆ្នាំ 2025 ខ្ញុំមានកិត្តិយសក្នុងការបង្ហាញឡើងវិញពីវឌ្ឍនភាពដ៏សំខាន់ដែលយើងបានសម្រេចរួមគ្នាក្នុងឆ្នាំ 2024។ ប៊ែមប៊ូ ហ្វាយនែន ភីអិលស៊ី បានបន្តប្តេជ្ញាយ៉ាងមុតមាំក្នុងការអនុវត្តបេសកកម្មរបស់ខ្លួន ដើម្បីរួមចំណែកដល់ការអភិវឌ្ឍសេដ្ឋកិច្ច និងការលើកកម្ពស់គុណភាពជីវិតរបស់ប្រជាជនកម្ពុជា តាមរយៈការផ្តល់សេវាហិរញ្ញវត្ថុប្រកបដោយទំនួលខុសត្រូវ សុចរិតភាព និងគ្មានការរើសអើង។ យើងបានក្លាយជាដៃគូដ៏គួរឱ្យទុកចិត្តសម្រាប់សហគមន៍ដែលខ្វះឱកាសទទួលបានសេវាហិរញ្ញវត្ថុ។
ទោះបីជាប្រឈមនឹងភាពមិនច្បាស់លាស់នៃសេដ្ឋកិច្ចសកល រួមទាំងការកើនឡើងនៃអតិផរណា និងភាពអស្ថិរភាពហិរញ្ញវត្ថុបន្តកើតមានក៏ដោយ ប៊ែមប៊ូ ហ្វាយនែន ភីអិលស៊ី នៅតែបង្ហាញពីភាពធន់ និងភាពបត់បែនដ៏ល្អឥតខ្ចោះ។ ក្រោមការដឹកនាំប្រកបដោយយុទ្ធសាស្ត្រច្បាស់លាស់ និងវិន័យប្រតិបត្តិការខ្ពស់  យើងបានរក្សាការរីកចម្រើនប្រកបដោយនិរន្តរភាព គ្រប់គ្រងហានិភ័យដោយប្រុងប្រយ័ត្ន និងអភិវឌ្ឍផលិតផលថ្មីៗ ដែលផ្តោតលើតម្រូវការអតិថិជនជាចម្បង។

សមិទ្ធផលសំខាន់ៗសម្រាប់ឆ្នាំ 2024

• កំណើនទ្រព្យសកម្ម: ទ្រព្យសកម្មសរុបបានកើនឡើងដល់ 30.52 លានដុល្លារអាមេរិក ស្មើនឹងកំណើន 22% បើធៀបនឹងឆ្នាំមុនដោយសារការគ្រប់គ្រងហិរញ្ញវត្ថុប្រកបដោយភាពម៉ត់ចត់ និងយុទ្ធសាស្ត្រពង្រីកដ៏រឹងមាំ។
• កំណើនផលប័ត្រឥណទាន: ផលប័ត្រឥណទានសុទ្ធបានកើនឡើង 27% ដល់ 29.21 លានដុល្លារអាមេរិក ដែលអនុញ្ញាតឱ្យយើងផ្តល់សេវាដល់អតិថិជនចំនួន 17,848 នាក់នៅទូទាំងប្រទេស។
• គុណភាពឥណទាន: គុណភាពឥណទាននៅតែរក្សាបានល្អ ជាមួយនឹងអនុបាតឥណទានមិនដំណើរការ (NPL Ratio) នៅកម្រិត 3.22% ដែលបង្ហាញពីការប្តេជ្ញាចិត្តក្នុងការផ្តល់ប្រាក់កម្ចីប្រកបដោយទំនួលខុសត្រូវ។
• កំណើនប្រាក់ចំណេញ: ប្រាក់ចំណេញសុទ្ធបន្ទាប់ពីបង់ពន្ធបានកើនឡើង 12% ពី 555,695 ដុល្លារអាមេរិក ដល់ 621,760 ដុល្លារអាមេរិក ដោយសារប្រតិបត្តិការប្រកបដោយប្រសិទ្ធភាព និងការគ្រប់គ្រងផលប័ត្រដ៏រឹងមាំ។
• អត្រាចំណូល: អត្រាចំណូលពីមូលធន (ROE) ស្មើ 11% និងអត្រាចំណូលពីទ្រព្យសកម្ម (ROA) ស្មើ 2% បង្ហាញពីសមត្ថភាពក្នុងការបង្កើតតម្លៃប្រកបដោយនិរន្តរភាព។
• ដើមទុនចុះបញ្ជី: ដើមទុនចុះបញ្ជីមានចំនួន 4.០ លានដុល្លារអាមេរិក ដែលឆ្លុះបញ្ចាំងពីភាពរឹងមាំនៃមូលដ្ឋានហិរញ្ញវត្ថុ ទំនុកចិត្តរបស់ភាគទុនិក និងចក្ខុវិស័យរយៈពេលវែងរបស់ ប៊ែមប៊ូ ហ្វាយនែន ភីអិលស៊ី។

សមិទ្ធផលទាំងនេះបានកើតឡើងពីការប្តេជ្ញាចិត្តដ៏មុតមាំរបស់បុគ្គលិក ទំនុកចិត្តដ៏រឹងមាំពីអតិថិជន និងដៃគូសហការរបស់យើង ព្រមទាំងការដឹកនាំប្រកបដោយភាពឆ្លាតវៃរបស់ក្រុមប្រឹក្សាភិបាល និងភាគទុនិក។

ជំរុញសេរីភាពក្នុងការធ្វើដំណើរ និងបើកផ្លូវឆ្ពោះទៅរកឱកាស 
យើងជឿជាក់ថា ការទទួលបានសេវាហិរញ្ញវត្ថុគឺជាមធ្យោបាយដ៏សំខាន់សម្រាប់ពង្រឹងសមត្ថភាពបុគ្គល។ នៅក្នុងបរិបទប្រទេសកម្ពុជា ដែលប្រព័ន្ធដឹកជញ្ជូនសាធារណៈនៅមានកម្រិត ការធ្វើដំណើរប្រកបដោយភាពងាយស្រួលគឺជាផ្នែកស្នូលនៃការចាប់យកឱកាសថ្មីៗ។ បច្ចុប្បន្នឥណទានម៉ូតូ ស្មើនឹង 88% នៃផលប័ត្រឥណទានសរុបរបស់យើង ដែលបានជួយឱ្យប្រជាជនកម្ពុជារាប់ពាន់នាក់ទទួលបានមធ្យោបាយធ្វើដំណើរដ៏គួរឱ្យទុកចិត្ត ដើម្បីទៅកាន់កន្លែងធ្វើការ សាលារៀន សេវាសុខភាព និងទីផ្សារពាណិជ្ជកម្ម។
ក្រៅពីការលើកកម្ពស់គុណភាពជីវិតបុគ្គល ឥណទានទាំងនេះបានជំរុញសេដ្ឋកិច្ចមូលដ្ឋានតាមរយៈការគាំទ្រអាជីវកម្មខ្នាតតូច ដូចជាសេវាដឹកជញ្ជូន ជាងជួសជុល និងហាងលក់គ្រឿងបន្លាស់ ព្រមទាំងរួមចំណែកដល់កំណើនសេដ្ឋកិច្ចទាំងនៅតំបន់ជនបទ និងទីប្រជុំជន។

តម្លៃស្នូលរបស់យើងក្នុងការអនុវត្ត 
លទ្ធផលនៃឆ្នាំ 2024 ឆ្លុះបញ្ចាំងពីតម្លៃស្នូលរបស់ ប៊ែមប៊ូ ហ្វាយនែន ដែលរួមមាន៖ អភិបាលកិច្ចល្អ សុចរិតភាពហិរញ្ញវត្ថុ ការទទួលខុសត្រូវ និងការផ្តោតសំខាន់លើអតិថិជន។ យើងបន្តចាត់ទុករាល់បញ្ហាប្រឈមជាឱកាសសម្រាប់ការរីកចម្រើនប្រកបដោយទំនួលខុសត្រូវ និងនិរន្តរភាព។ សម្លឹងទៅអនាគត យើងនៅតែប្តេជ្ញាពង្រឹងសមត្ថភាពតាមរយៈការច្នៃប្រឌិតឌីជីថល ការធ្វើពិពិធកម្មផលិតផល និងការអភិវឌ្ឍទេពកោសល្យ។ គោលដៅរបស់យើងគឺរក្សាភាពរហ័សរហួន បរិយាបន្ន និងចក្ខុវិស័យឆ្ពោះទៅមុខក្នុងគ្រប់សកម្មភាពរបស់យើង។

ជាចុងក្រោយ ខ្ញុំសូមថ្លែងអំណរគុណយ៉ាងជ្រាលជ្រៅជូនចំពោះអតិថិជនទាំងអស់ សម្រាប់ការគាំទ្រ និងទំនុកចិត្តរបស់ពួកគាត់។ សូមអរគុណដោយ ស្មោះស្ម័គ្រជូនចំពោះភាគទុនិក និងក្រុមប្រឹក្សាភិបាលទាំងអស់ ចំពោះទំនុកចិត្ត ការណែនាំ និងការគាំទ្រជាបន្តបន្ទាប់ ដែលជួយឱ្យយើងសម្រេចបានជោគជ័យរយៈពេលវែង។ ឆ្លៀតក្នុងឱកាសនេះខ្ញុំសូមថ្លែងអំណរគុណដ៏ជ្រាលជ្រៅជូនចំពោះគណៈគ្រប់គ្រង និងបុគ្គលិកគ្រប់ជាន់ថ្នាក់ ចំពោះការដឹកនាំ និងការបំពេញការងារប្រកបដោយភាពឆ្លាតវៃ ការប្តេជ្ញាចិត្តខ្ពស់ ភាពស្មោះត្រង់ និងទំនួលខុសត្រូវ។
សូមជូនពរ សុខភាពល្អ  សុភមង្គល និងទទួលបានជោគជ័យគ្រប់ភារកិច្ចក្នុងឆ្នាំ ២០២៥ នេះ!

លោក កែវ សុខា

អគ្គនាយក | ប៊ែមប៊ូ ហ្វាយនែន ភីអិលស៊ី