គ្រឹះស្ថានមីក្រូហិរញ្ញវត្ថុ ប៊ែមប៊ូ ហ្វាយនែន ភីអិលស៊ី រៀបចំវគ្គបំពាក់បំប៉នស្តីពី «តួនាទី និងការទទួលខុសត្រូវក្នុងភាពជាអ្នកដឹកនាំ» ដើម្បីពង្រឹងប្រសិទ្ធភាពការងារ
រាជធានីភ្នំពេញ ថ្ងៃទី០៥ ខែមីនា ឆ្នាំ២០២៦ — ក្នុងគោលដៅលើកកម្ពស់សមត្ថភាពគ្រប់គ្រង និងប្រសិទ្ធភាពការងារ គ្រឹះស្ថានមីក្រូហិរញ្ញវត្ថុ ប៊ែមប៊ូ ហ្វាយនែន ភីអិលស៊ី (Bamboo Finance PLC.) សហការជាមួយ ក្រុមហ៊ុន ១២១ សបភី ឯ.ក បានរៀបចំវគ្គបំពាក់បំប៉នកម្រិតខ្ពស់ក្រោមប្រធានបទ «តួនាទី និងការទទួលខុសត្រូវក្នុងភាពជាអ្នកដឹកនាំ»។
វគ្គបំពាក់បំប៉ននេះ ត្រូវបានរៀបចំឡើងជាពិសេសសម្រាប់ថ្នាក់ដឹកនាំចាប់ពីកម្រិតគ្រប់គ្រងថ្នាក់កណ្តាល រហូតដល់ថ្នាក់ជាន់ខ្ពស់ ដើម្បីពង្រឹងសក្តានុពលភាពជាអ្នកដឹកនាំ និងជំរុញវប្បធម៌ការងារប្រកបដោយវិជ្ជាជីវៈ និងប្រសិទ្ធភាព។
សកម្មភាពសំខាន់ៗក្នុងកម្មវិធី
ជាកិច្ចចាប់ផ្តើម លោក កែវ សុខា អគ្គនាយកនៃគ្រឹះស្ថានមីក្រូហិរញ្ញវត្ថុ ប៊ែមប៊ូ ហ្វាយនែន ភីអិលស៊ី បានអញ្ជើញបើកវគ្គបំពាក់បំប៉នជាផ្លូវការប្រកបដោយអត្ថន័យដ៏មានខ្លឹមសារ។ គ្រឹះស្ថានក៏មានកិត្តិយសយ៉ាងខ្ពង់ខ្ពស់ដែល ឯកឧត្តមបណ្ឌិត សាស្ត្រាចារ្យ ហោ ប៊ុនឡេង អញ្ជើញជាវាគ្មិនក្នុងកម្មវិធីនេះ ដោយបានចែករំលែកនូវចំណេះដឹង និងបទពិសោធន៍ជាក់ស្តែងដ៏មានតម្លៃ លើប្រធានបទ “តួនាទី និងការទទួលខុសត្រូវក្នុងភាពជាអ្នកដឹកនាំ”។ 
ខ្លឹមសារគន្លឹះនៃវគ្គបំពាក់បំប៉ន
តាមរយៈវគ្គបំពាក់បំប៉ននេះ អ្នកគ្រប់គ្រងទាំងអស់បានទទួលនូវចំណេះដឹង និងជំនាញសំខាន់ៗជាច្រើន រួមមាន៖
• យុទ្ធសាស្ត្ររៀបចំផែនការ៖ ការកំណត់ផែនការសកម្មភាពច្បាស់លាស់ដើម្បីសម្រេចគោលដៅរួមរបស់គ្រឹះស្ថាន។
• សិល្បៈនៃការដឹកនាំ៖ ការជំរុញទឹកចិត្ត ការពង្រឹងទំនាក់ទំនង និងការកសាងស្មារតីសហការក្នុងក្រុម។
• ការអភិវឌ្ឍធនធានមនុស្ស៖ ការបណ្តុះបណ្តាលបន្ត និងការផ្តល់ឱកាសអភិវឌ្ឍន៍ជំនាញដល់បុគ្គលិកក្រោមឱវាទ។
• ការគ្រប់គ្រងលទ្ធផល៖ បច្ចេកទេសតាមដាន វាយតម្លៃ និងការផ្តល់មតិកែលម្អប្រកបដោយស្ថាបនា។
• ការដោះស្រាយបញ្ហា៖ វិធីសាស្ត្រដោះស្រាយឧបសគ្គ និងបញ្ហាប្រឈមនានាក្នុងបរិបទការងារជាក់ស្តែង។
ជាកិច្ចបញ្ចប់នៃវគ្គបំពាក់បំប៉ន ថ្នាក់ដឹកនាំបានផ្តល់កិត្តិយសប្រគល់វិញ្ញាបនបត្របញ្ជាក់ការបំពាក់បំប៉នជូនដល់សិក្ខាកាមគ្រប់រូប ក្នុងបរិយាកាសយ៉ាងស្និទ្ធស្នាល និងមោទនភាព។
ការវិនិយោគលើធនធានមនុស្ស គឺជាអាទិភាពចម្បងរបស់ គ្រឹះស្ថានមីក្រូហិរញ្ញវត្ថុ ប៊ែមប៊ូ ហ្វាយនែន ភីអិលស៊ី ។ យើងជឿជាក់យ៉ាងមុតមាំថា ការពង្រឹងសមត្ថភាពថ្នាក់ដឹកនាំ គឺជាគ្រឹះដ៏សំខាន់ក្នុងការជំរុញសមត្ថភាពគ្រឹះស្ថាន និងផ្តល់សេវាកម្មដ៏ល្អប្រសើរជូនដល់អតិថិជនប្រកបដោយចីរភាព។